Gouel Breizh bro Montroulez
25/05/25 - aozet gant Ti ar vro Montroulez - KLT (Kerne Leon Treger)
En em gavet omp e sal gouelioù Langolvaz (kostez Treger !) e kichen standoù Kuzul ar Brezhoneg, Skol Vreizh, Ar Redadeg, Splann, Diwan Montroulez.... un daou-ugent stand bennak a oa bet staliet evit an degouezh "Gouel Breizh bro Montroulez".
Leun a dud oa deuet da zañsal, selaou, sellet ouzh ar standoù, pakañ ur banne ha debriñ krampouezh lipous. Leun mat oa ar sal kreiz an endervezh ! Dalc'het oa bet standig KEAV, kinklet brav gant e livioù flamm, etre 2 eur ha 7 eur noz. Tremenet oa tud a bep seurt dirazomp, kurius un tamm, dedennet mat evit lod. Pevar den o deus lavaret e oant dedennet da vat, ha prest vefent war a seblant da enskrivañ evit ar bloaz. Meur a hini zo distro d'ar gêr gant pleg-dibleg pe follennig-nij KEAV.
Eskemmoù oa bet ivez gant tud Kuzul ar Brezhoneg, ha skol Diwan Montroulez, staliet tal da stand KEAV. Ur blijadur eo bet kejañ gant kement a dud ha displegañ petra oa stajoù dre soubidigezh. Ouzh ar mikro oa bet displeget ganeomp ivez pal hor stajoù Hañv en div yezh brezhoneg ha galleg. Ha stajoù dibenn-sizhun kan, bef, studi....
